Wednesday, March 10, 2021

အသံမကောင်းရကောင်းလားဆိုပြီး ပါးကိုဘယ်ညာပိတ်ချပါတယ်


ကမ္ဘာမကြေဘူးနဲ့ အလိုမရှိသီချင်းတွေဆိုခိုင်းပြီး အသံမကောင်းရကောင်းလားဆိုပြီး ပါးကိုဘယ်ညာပိတ်ချပါတယ်။ ဂျပန်ခေတ်အကြောင်း ပြောနေတာမဟုတ်ပါဘူး။ မြိတ်အကျဥ်းထောင်ရောက်နေတဲ့ ကျွန်တော့်သူငယ်ချင်းတွေပါ။

.

မိန်းကလေးနေနေ ယောကျ်ားလေးနေနေ သံကြိုးတွေ ကြာပွတ်တွေနဲ့ ခန္ဓာကိုယ်ပတ်လည် အရှိုးရာပြိုင်းပြိုင်းထအောင်ရိုက်ခံရပါတယ်။ အဆိုးဝါးဆုံးကတော့ အဖမ်းခံရလို့ အချုပ်ထဲရောက်ပြီးကာမှ လှုပ်မရအောင်တုပ်ပြီး လည်ပင်းကို ရာဘာကျည်နဲ့တေ့ပစ်ခံရလို့ ဒဏ်ရာအကြီးကြီးရလာတဲ့ ညီမငယ်တယောက်ရဲ့အဖြစ်ပါပဲ။

.

ကျောင်းကဆရာဆရာမတွေနဲ့ ရှေ့နေတွေလိုက်ပြီး သွားထုတ်ပေမယ့် တယောက်တလေပဲထွက်လို့ရခဲ့ပြီး အများစုကို ထောင်သွင်းအကျဥ်းချပြီး နောက်ရက်တွေမှ ပုဒ်မထုတ်ပြန်မယ်ဆိုတဲ့ အဖြေသာရခဲ့ပါတယ်။

.

ပါသွားတဲ့အထဲ ကျွန်တော်နဲ့သိပ်ကိုရင်းနှီးတဲ့ သူငယ်ချင်းတွေပါပါတယ်။ သူတို့တွေက ပကာသနဂုဏ်ဒြပ်အတွက်နဲ့ လမ်းပေါ်ထွက်လာတဲ့သူတွေ မဟုတ်ပါဘူး။ တိုင်းပြည်အတွက် ကျွန်တော်တို့အနာဂတ်တွေအတွက် ပေးဆပ်ဖို့ရှေ့ကို ရောက်လာခဲ့ကြတာပါ။ လက်နက်ကိုင်တွေဟာ အသေပစ်ဖမ်းမယ်ဆိုတာ သိသိရက်နဲ့ လမ်းမပေါ်တက် ပြည်သူ့ဆန္ဒကို ရဲရဲတောက်ထုတ်ဖော်ခဲ့တဲ့ သူငယ်ချင်းတွေ သူရသတ္တိရင့်သန်လွန်းရလို့ သိပ်ဂုဏ်ယူမိပါတယ်။

.

ဒါပေမယ့်အခု သူတို့လေးတွေရဲ့ အနာဂတ်ကို အကျဥ်းထောင်ရဲ့ သံတိုင်တွေ၊ သွေးစက်တွေက ဝါးမျိုဖို့ဟန်ပြင်နေပါပြီ။ ဂျပန်ခေတ်မှာတောင် မသုံးတဲ့နည်းတွေသုံးပြီး အကျဥ်းထောင်ထဲ ရာဇဝတ်သားလို နှိပ်စက်ခံနေရပါပြီ။

.

မြန်မာနိုင်ငံရဲ့ အထူးပြည်သူ့အဖွဲ့အစည်းတွေ၊ မီဒီယာတွေ၊ ပရဟိတအဖွဲ့အစည်းနဲ့ ရှေ့နေအသင်းတွေ ကျွန်တော့်သူငယ်ချင်းတွေအတွက် တခုခုကူပေးကြပါဦး။ တောင်းဆိုပါရစေဗျာ။ ပြည်သူ့အတွက် ပြည်သူကတင်မြှောက်တဲ့ ပြည်သူ့အစိုးရဖြစ်ဖို့တောင်းဆိုရင်း လူမဆန်အောင် ဥပဒေမဲ့နှိပ်စက်ညှင်းပန်းခံနေရတဲ့ ကျွန်တော်တို့ သူငယ်ချင်းတွေကို ကယ်တင်ပေးကြပါဦးဗျာ။ ကျွန်တော် တောင်းဆိုနေတာပါ။

.

ကျွန်တော့်သူငယ်ချင်းတွေမှာ ဘာအပြစ်ရှိလို့လဲဗျာ။


(Media ရှားပါးတဲ့ နယ်မြို့လေးဖြစ်လို့ ကူညီ share ပေးဖို့ အောက်ကျို့ခံတောင်းဆိုပါတယ်)


Plz share more and speak out 

#crd 

#CrimesAgainstHumanity



No comments: