Wednesday, March 17, 2021

လက်နက်ဖြင့် ခြိမ်းခြောက်ပြီး အတားအဆီးများကို ဖယ်ရှားခိုင်းနေ

စစ်တပ်နှင့်ရဲက ပြည်သူလူထုအား လက်နက်ဖြင့် ခြိမ်းခြောက်ပြီး အတားအဆီးများကို ဖယ်ရှားခိုင်းနေ ဧရာဝတီ၊ မတ် ၁၇၊ ၂၀၂၁ အာဏာသိမ်း စစ်ကောင်စီ၏ စစ်တပ်နှင့်ရဲများက ရန်ကုန်မြို့တွင်း လမ်းမများပေါ် သွားလာနေသည့် အမျိုးသားများကို ဖမ်းဆီးကာ ပြည်သူလူထုက ပြုလုပ်ထားသည့် အတားအဆီးများကို ဖယ်ရှားခိုင်းခြင်းများ ပြုလုပ်လျက်ရှိသည်။ လှည်းတန်းတွင် နေထိုင်သူ မမေသူက “ ကျမတို့ လှည်းတန်း စိန်ဂေဟာရှေ့နဲ့ ဦးထွန်းလင်းခြံလမ်းဘက်မှာတင် နေ့လည်က ရိုက်နှက်ပြီး ဖမ်းခေါ်ခံရတဲ့ အမျိုးသား ၆ ဦးကို စိန်ဂေဟာနားက လူထုခံတပ် သဲအိတ်တွေကို မရွှေ့ပြီး သူတို့ ခေါ်လာတဲ့ ကားတစီးပေါ် တင်ခိုင်းတယ်။ သဲအိတ်တွေ ဖယ်ချင်ရင် သူတို့ဘာသာသူတို့ မဖယ်ဘဲ လမ်းကလူတွေကို ဖမ်းပြီး အဓမ္မခိုင်းတာမျိုးလုပ်နေတာ။ ကျမအိမ်ရှေ့မှာပဲ မြင်ရတာပါ” ဟု ပြောသည်။ ကမာရွတ်၊ စမ်းချောင်းနှင့် ရန်ကင်းမြို့နယ်တို့တွင်လည်း လမ်းသွားလမ်းလာများ၊ ကားများကို တားဆီးပြီး သဲအိတ်များ ဖယ်ရှားပေးရန် လက်နက်ဖြင့် ခြိမ်းခြောက်ပြီး ပေါ်တာဆွဲကာ ခိုင်းစေသည့် ပုံစံမျိုးဖြင့် စစ်တပ်နှင့်ရဲက လုပ်ဆောင်နေခြင်း ဖြစ်သည်။ စစ်အုပ်ချုပ်ရေးအဖြစ် ကြေငြာခံထားရသည့် လှိုင်သာယာမြို့နယ်တွင်လည်း စစ်တပ်နှင့်ရဲက ရပ်ကွက်နှင့်လမ်းများ အတွင် အတားအဆီးပြုလုပ်ထားသည်များကို ဖယ်ရှားပေးရန် လိုက်လံအော်ပြောနေပြီး ဖယ်ရှားခြင်း မပြုပါက ရပ်ကွက်များ၊ လမ်းများ အတွင်း ပစ်ခတ်မည်ဟု ပြောဆိုလျက်ရှိသည်။ ဒေသခံတဦးက "လှိုင်သာယာ တံတားဖြူမှတ်တိုင်မှာ အတွင်းထဲကို လှမ်းပစ်နေပါတယ်။ လမ်းထဲက အတားအဆီးတွေကို ဖယ်ပေးဖို့ လှမ်းပြောနေပါတယ်။ သူတို့ဝင်လာရင် အကုန်ပစ်မယ်လို့ ပြောတယ်။ သူတို့ဝင်လာရမလား။ လမ်းကတားတာတွေ ဖယ်ပေးရမလား ပြောနေတယ်။ ပြည်သူတွေက ပစ်နေတာ့ မထွက်ရဲဘူး ဖြစ်နေတယ်" ဟု လက်ရှိအခြေအနေကို ပြောပြသည်။ စစ်တပ်နှင့်ရဲက စစ်အာဏာရှင်ဆန့်ကျင်ရေး ဆန္ဒပြနေသည့် လူထုကို ပစ်ခတ်သတ်ဖြတ်ခြင်း၊ အကြမ်းဖက် ရိုက်နှက်ခြင်း များ ပြုလုပ်သည့်အပြင် ရပ်ကွက်လမ်းများအတွင်းနှင့် နေအိမ်များအတွင်းထိ ဝင်ရောက် ရိုက်နှက်ဖမ်းဆီးခြင်းများ ပြုလုပ်သဖြင့် ရပ်ကွက်နေလူထုက ၎င်းတို့ ဝင်မလာစေရန် အတားအဆီးများ ပြုလုပ်ထားခြင်း ဖြစ်သည်။ #WhatIsHappeningInMyanmar #RejectMilitaryCoup အတားအဆီးတွေထပ်လုပ်ရင် အိမ်တိုင်းကိုဆိုင်ဆိုင်မဆိုင်ဆိုင်ပစ်မယ်တဲ့.. သူပုန်ထက်ပိုပြီး ကင်ပွန်းတပ်ရမဲ့ကောင်တွေ ကမ္ဘာ့အယုတ်မာဆုံးတပ်ဖွဲ့

No comments: