Tuesday, March 23, 2021

ဘန်ကာတွေ GZတွေအရေးပေါ်လိုအပ်နေတဲ့ရန်ကုန်



ဒီနေ့ဖြစ်ပျက်သွားတဲ့ အဖြစ်အပျက်ပါ

ကျနော်တို့ ရပ်ကွက်ထဲကို နေ့လည် (၂:၃၀ လောက်) ရဲနှင့်စစ်သား အင်အား ၁၀ ယောက်လောက် ဝင်လာပါတယ်။

ကျနော်တို့ ရပ်ကွက်က သူများတွေလို လမ်းအလိုက် ဖွဲ့စည်းထားတာမျိုး မဟုတ်ပဲ တိုက်တန်းလျားနဲ့ ဖွဲ့စည်းထားတဲ့ ဧရိယာ အကျယ်အဝန်းဖြစ်တဲ့အတွက်ကြောင့် ဝင်ပေါက်တွေက ရပ်ကွက်ရဲ့ အဘက်ဘက်မှာ ရှိပါတယ်။

အဲ့ဒီထဲမှာမှ စစ်သားတွေက ကျနော်တို့ ဘက်အဝင်ပေါက်ကနေ ဝင်လာခဲ့ပါတယ်။

ကျနော်တို့ ရဲ့အပိုင်းကရပ်ကွက်ရဲ့ အဆိတ်ငြိမ်ဆုံးနဲ့ လူသူအသွားအလာ အနည်းဆုံး အပိုင်းပါ။သို့သော်ငြားလည်း လမ်းမပေါ်ကို ထွက်ချင်ရင်တော့ ကျနော်တို့ဘက်ကနေထွက်ရပါတယ်။

ကျနော်တို့ ရပ်ကွက်လည်း သူများနဲ့တူစွာ ရပ်ကွက်ရဲ့ ဝင်ပေါက် အသီးသီးကို သဲအိတ် ဝါးကာ ကိုယ်စီနဲ့ ကာထား ကြပေမဲ့ မနေ့က စစ်ကားနဲ့ ရောက်လာပြီး အဲ့တာတွေကို အပြီး ဖြိုထားဖို့ လာအော် သွားကြပါတယ်။

သက်ကြီးရွယ်အိုတွေပဲနေတာက တကြောင်း 

တော်လှန်ရေးမှာပတ်သတ်မှုသိပ်မရှိတဲ့ အပိုင်းဖြစ်တာက တကြောင်းနဲ့ သူတို့နဲ့ ထိပ်တိုက်မတွေ့ချင်ဘူး ဆိုပြီး အိမ်နားက လူကြီးသူမ တိုင်ပင်ကာ ကာထားတဲ့ barricades တွေကို ကျနော်တို့ ဖယ်ရှားပေးလိုက်ပါတယ်။

ဝါးကာတွေကို ဖြိုပြီး သဲအိတ်တွေကိုလည်း ကျနော်တို့ ရွေ့ပေးလိုက်ပါတယ်။လမ်းလူငယ် နည်းပါးမှုနဲ့ တတ်နိုင်သလောက် တရက်တည်းနဲ့ ရွှေ့ကြတာကြောင့် သဲအိတ် အိတ် ၂၀ လောက်ကတော့ ကျန်ခဲ့ပါတယ်။သို့ပေမဲ့ တော်တော်များများ ဖယ်ရှားပေးလိုက်တာကြောင့် လမ်းက ပွင့်နေပါပီ။

ဒါပေမဲ့ ဒီနေ့ထပ်ရောက်လာပြီး ကျန်နေတဲ့ အဲ့ သဲအိတ်တွေကိုပါ အကုန် လမ်းမပေါ်က ဖယ်ဖို့ ဒီနေ့ မှ အကုန်မဖယ်ရင် သူတို့ အဆိုး မဆို ဖို့ လာကြိမ်းဝါးသွားပါတယ်။

အဲ့မှာ ကျနော် စဉ်းစားစရာ ဖြစ်မိတာပါ။

တကယ်ဆို ဒီကျန်ခဲ့တဲ့ သဲအိတ် ၂၀ လောက်ဆိုတာ ဘာမှ မဖြစ်စလောက် ပမာဏ ဖြစ်ပြီးတော့ တကယ်တမ်း သူတို့ ဝင်မယ်ဆိုရင် လူသာမက ကားပါ အလွယ်တကူ ဝင်လို့ရတဲ့ အနေအထားပါ။

အဲ့တာကို သူတို့က ဖယ်ခိုင်းတယ် ဆိုတည်းက အကြောင်းရင်းက လမ်းမပေါ်မှာ ရှိနေတာကို မမြင်စေချင်လို့ပါ

အဲ့ဒီနောက် ကျနော်လည်း အလုပ်ကိစ္စနဲ့ အသိတယောက်ဆီ သွားစရာရှိတာကြောင့် ချက်ချင်းပဲ ကားနဲ့ထွက်လာခဲ့ပါတယ်။

ပုံမှန်ဆို အဲ့ဒီလောက် သတိထားပြီး မကြည့်မိပေမဲ့

ကိုယ့်ရပ်ကွက်မှာ ပူပူနွေးနွေး ဖြစ်ထားကာစ ဆိုတော့ သွားရာ လမ်းတလျောက် ဘေးဘီဝဲယာက လမ်းတွေကို အကဲခတ်ကြည့်မိတဲ့ အခါမှာ ကျနော်သွားနေတဲ့ လမ်း တလျှောက်မှာ ရှိတဲ့ လမ်းသွယ် ရပ်ကွက်ထိပ် တော်တော်များများမှာ ဘာအကာအကွယ် မှ မရှိတော့တာကို တွေ့ရပါတယ်

(အလုပ်သမား ဆေးရုံရှေ့က ပလာဇာ လမ်းသွယ်များ၊ဖိုးစိန်လမ်းက အထွက် တာမွေလမ်းထိပ်က အကာများ၊)

အဲ့တာနဲ့ ကျနော်သွားမဲ့နေရာရဲ့(တာမွေ တနေရာ)

လမ်းထိပ်ကိုရောက်တော့ လူတွေအုံ့နေလို့ လမ်းကြည့်လိုက်တဲ့အခါမှာ စစ်ကား ၅ စီးလောက်နဲ့ ရောက်နေကြပြီး လမ်းထဲက လူတွေကို ခေါ်ပြီး တလမ်း ချင်းစီက အကာ တွေကို ဖြိုခိုင်းနေတာကို တွေ့ရတာကြောင့် မဝင်ပဲ ပြန်လှည့်ခဲ့ရပါတယ်။

မလှည့်ခင် အနားမှာ ရှိနေတဲ့ ရပ်ကွက်သူ တယောက်ကို မေးကြည့်လိုက်တဲ့အခါမှာတော့

“သူတို့ ရပ်ကွက်ထဲမှာ တပ်လာဆွဲထားတာ လဆန်းပိုင်းထဲကဖြစ်ပေမဲ့ ရပ်ကွက်နဲ့တိုင်ပင်ပြီး ဘာ ပစ်ခတ် အကြမ်းဖတ်မှုမှမလုပ်ခဲ့ဘူး။သူတို့ ရပ်ကွက်သားတွေကိုယ်တိုင်လည်း ကိုယ်စီ လမ်းတိုင်းမှာ ညသပိတ်၊ကင်းစောင့် တာတွေ တောက်လျှောက် လုပ်ခဲ့တာ ဘာမှ မဖြစ်ခဲ့ပေမဲ့ ဒီနေ့ တပ်ရင်း တခု လုံး အသစ် လာလဲလှယ်ပြီး နောက်ရောက်လာတဲ့ တပ်မက လူတွေက လုပ်ခိုင်းနေတာလို့ပြောပါတယ်။လမ်းထိပ်က သဲအိတ်တွေသာမက ထိပ်ကနေကြည့်လိုက်ရင် တလမ်းလုံး ထိုးလျိုပေါက် အကုန်မြင်နေရအောင် ဖယ်ထားဖို့၊ကားတွေကို လည်း ကပ်ပြီး ရပ် ဆိုပြီး ခပ်ကြမ်းကြမ်းအော်သွားတယ်” လို့ပြောပါတယ်။

ကျနော်လည်း မသင်္ကာလို့ အိမ်မပြန်ပဲ ကားပတ်မောင်းကြည့်လိုက်တဲ့အခါမှာ နေရာ တော်တော်များများမှာ ဘာအကာမှမရှိပဲ လမ်းတွေက ရှင်းလင်းနေပါပီ

စက်စမ်းဘက်မှာဆို ပုံမှန်တိုင်းသွားလာနေပြီးတော့ အရင် အုတ်သဲ ရောင်းတဲ့ဆိုင်တွေ ပိတ်ထားတာကို တွေ့ခဲ့ရပါတယ်။

(မပိတ် ပဲ ဖွင့်ထားတဲ့ ဆိုင်တဆိုင်ရှေ့မှာ စစ်ကား နှစ်စီးနဲ့ ဆိုင်ထဲဝင်ပြီး ဆိုင်ရှင်နဲ့စကားပြောနေတာတော့တွေ့ခဲ့ပါတယ်)

သာကေတ ရွှေပုဇွန်လမ်းမကြီး....အကုန်ရှင်းလင်းနေပါတယ်။လမ်းမရဲ့ ဘယ်ဘက်ချမ်းက နဂိုတည်းက သီးသန့်အိမ်ရာဝင်းနဲ့ စက်မှုဇုံပိုင်းဖြစ်တာကြောင့် အကာအကွယ်မရှိတာက သဘာဝ ကျပေမဲ့ ညာဘက်ခြမ်းမှာ ရှိတဲ့ ၈ ဂိတ်တို့ ၅ ထိပ်တို့ ရပ်ကွက်ထိပ်မှာလည်း အကာတွေကို ဖျက်ထားတာ တွေ့ခဲ့ရပါတယ်။(ရပ်ကွက်အတွင်းပိုင်းတော့မသိ)

အစက ဒီသဲအိတ် အကာတွေကို ဖယ်ခိုင်းထားက ရပ်ကွက်နေ Gen Z များနဲ့ Gen Lee များကို ရန်တိုက်ပေးတာရယ်၊ပြည်သူလူထု ရဲ့ခေါင်းထဲကို အကြောက်တရား ရိုက်သွင်းတာရယ် ဆိုတာကို လက်ခံခဲ့ပေမဲ့ သူတို့ဆီမှာ နောက်ထပ် ရည်ရွယ်ချက်တခု ရှိနေနိုင်တယ်လို့ ထင်ပါတယ်။

အခုဒီနေ့ ကျနော် သွားခဲ့တဲ့ ရန်ကုန်မြို့ရဲ့ နေရာတော်တော်များများကို အပြင်က မသိသူတယောက်က ကြည့်လိုက်မယ်ဆိုရင် တော်လှန်ရေး ဖြစ်နေတဲ့ မြို့တမြို့နဲ့ မတူပဲ COVID ကြောင့် new normal မှာ နေသား ကျဖို့ ကြိုးစားနေတဲ့ မြို့တခုနဲ့ ပိုတူနေပါတယ်။ လူတွေ ကားတွေ ပလူပျံအောင် မသွားလာနေပေမဲ့ လမ်းမပေါ်ရှိနေတဲ့ လူတချို့နဲ့ဘေးပတ်ဝန်းကျင်နဲ့ သဟာဇတ ကျနေမှုကို ကြည့်လိုက်ရင်တော့ ဘယ်လိုမှ တော်လှန်ရေး ဖြစ်နေတယ်လို့ မထင်ရတာတော့ အမှန်ပါ။

အိမ်ပြန်လမ်းမှာဆိုရင် မနေ့ကမှ သူတို့ လူလာသတ်သွားတဲ့ ရပ်ကွက်ဆိုရင် ဘာအတားအဆီးမှ မရှိတော့တဲ့ အပြင် လူတွေဟာဆို ဥဒဟို သွားလာနေကြတာ COVID second wave ကာလ ကထက်ကိုပိုများနေပါတယ်။လက်ဖက်ရည်ဆိုင် ဘီယာဆိုင်မှာ ရီရီမောမော ထိုင်နေကြတဲ့အပြင် ရပ်ကွက် ဒလံလို့ အခိုင်အမာ နာမည်ထွက်နေတဲ့ စတိုးဆိုင် ကနေလည်း အခင်အမင် မပျက် စျေးဝယ်သွားလာ နေတာကို တွေ့ခဲ့တာကြောင့် ကြည့်ရင်း ခံပြင်းခဲ့မိပါတယ်။

ဒါဟာ သူတို့ ထည့်တဲ့ psywar ရဲ့ စတင်အောင်မြင်လာမှုပဲလား ဒါမှမဟုတ် သူတို့ရဲ့နောက်ကွယ်က ရည်ရွယ်ချက်ဖြစ်တဲ့ တစုံတဦး/အဖွဲ့အစည်း တခုခု ကို အမြင်မှားအောင် ပြသချင်တဲ့ တော်လှန်ရေးဝင်နေတဲ့ ရန်ကုန်မြို့ရဲ့ ပုံရိပ်ယောင် ဖန်တီးမှုပဲ လားတော့ မသိပါ။

(စမ်းချောင်း၊လှည်းတန်း၊အင်းစိန်၊လှိုင် ဘက်တွေတော့ မပါပါ ခင်ဗျာ။ဒီနေ့ ကျနော်ကိုယ်တိုင်သွားခဲ့ပြီး မျက်မြင်တွေ့ခဲ့ရတဲ့ နေရာတွေကိုပဲ ဆိုလိုပါတယ်)

ဒါဟာ ရပ်ကွက်ရဲ့ တဒင်္ဂ အေးချမ်းမှုကိုပဲ ကြည့်ပြီး ဖာသိဖာသာ နေနေလိုက်မယ်ဆိုရင် ရပေမဲ့ ဟို စောက်ရူး lobbyist ပြောသလိုများ အကယ်၍ စစ်ခွေး အာဏာရူးတွေက မကြာခင် နိုင်ငံခြားသတင်းထောင်တွေနဲ့ UN envoys တွေကို ပြည်ဝင်ခွင့်ပေးတော့မယ်ဆို ဒါဟာ အင်မတန် အန္တရာယ်များတဲ့ အချက်လို့မြင်ပါတယ်။

ယခုထက်ထိ တော်လှန်ရေးအတွင်း ဖြစ်ပျက်နေတဲ့ စစ်ခွေးသူတောင်းစားတွေရဲ့ ယုတ်မာမှု လူမဆန်စွာ သတ်ဖြတ်မှုတွေက social media platform နေကနေတဆင့် နိုင်ငံတကာ ကသိနေတယ်ဆိုပေမဲ့ အဲ့ဒီ awareness တွေက ကျနော်တို့ ပြည်သူပြည်သားတွေက သက်စွန့်စံဖျား ယူထားတဲ့ ဓါတ်ပုံ/ဗီဒီယို သက်သေတွေပါ။ကျနော် သိရသလောက်ကတော့ ဘယ်နိုင်ငံတကာ သတင်းကောက်ကိုယ်တိုင်ကမှ ပြည်တွင်းမှာ ယူထားတဲ့ အချက်အလက်တွေမဟုတ်ပါဘူး။

အကယ်၍များ အာဏာရူးအစိုးရက ဒီလိုမျိုး အသေးစိတ် အစီအစဉ်ဆွဲပြီး ရန်ကုန်မြို့ရဲ့ နေရာတော်တော်များများက တော်လှန်ရေးအရိပ်အယောင် ဟပ်နေတဲ့ ရုပ်ဝတ္ထု ပစ္စည်းသက်သေတွေကို အောင်မြင်စွာဖယ်ရှားပြီးမှ ပြည်ဝင်ခွင့် ဖွင့်လိုက်မယ်ဆိုရင် ရောက်ရှိလာမဲ့ ကိုယ်စားလှယ်တွေ သတင်းထောက်တွေကို ပုံမှား ရိုက်ကောင်း ရိုက်နိုင်မှာပါ။

ရက် (၅၀) ကြာ ရရှိထားတဲ့ သက်တွေရှိတယ်ဆိုသော်ငြားလည်း မျက်မြင်မှာ လူတွေက ဘာစိုးရိမ်မှုမှမရှိ သွားလာနေကြတယ်ဆိုတဲ့ မြင်ကွင်းကို ပြလိုက်နိုင်မယ်ဆိုရင် ကိုယ်စားလှယ်တွေအနေနဲ့ အသိစ်တ်က လက်မခံ ချင်သော်ငြားလည်း မျက်စိရှေ့က အဖြစ်အပျက်တွေကြောင့် ကူညီချင်လျက်နဲ့မကူညီနိုင်ပဲ တပ်ခေါက်ပြန်သွားရမှာမျိုးကို စိုးရိမ်ရပါတယ်

နောက်တချက်က နိုင်ငံတကာ မီဒီယာများနှင့်အတူ သူတို့ ကြိုတင် စည်းဝါးရိုက်ပြီး ငှါးထားတဲ့ lobbyist တွေ အပေါစား သတင်းထောက်တွေ(probably from China mainland) ပါ ရောရောက်လာပြီး။အခွင့်ကောင်းယူကာ သူတို့ ဘက်ကနေ ကလိမ်ကကျစ် မပြောပေးဘူးလို့လဲ မစဉ်းစားထားလို့မရပါဘူး။

“ရန်ကုန်မှာအဲ့လို ဖြစ်နေပေမဲ့ မြန်မာနိုင်ငံရဲ့ တခြားမြို့တွေမှာ နေ့စဉ်လူတွေ ပြင်းပြင်းထန်ထန် တိုက်ပွဲ ဝင်နေကြတယ်ပဲလေ အဲ့တာတွေကို ကြည့်ရင် revolution ကိုသိနိုင်တာပဲ” လို့ ဆိုကောင်းဆိုနိုင်ပေမဲ့ အကယ်၍ UN တွေ international representatives ဝင်လာခဲ့သည်ရှိသော် အရင်ဆုံးနဲ့မဏ္ဍိုင် ထားပြီး လာရောက်ကြည့်ရူမှာက ရန်ကုန်လို့ထင်ပါတယ်။

(မန္တလေး၊တောင်ကြီး သွားကောင်းသွားနိုင်၊

နေပြည်တော် ရန်ကုန်ထက် အခြေအနေ ပိုဖြောင့်ဖြူးလို့ကြားရ)

ထိုအချိန်ရောက်မှ မသိမသာ နယ်မြို့ကို ယခုလိုမျိုး သတင်းအမှောင်ချထားရင်လည်း ဘာမှမတတိနိုင်ပါ။


ကျနော်တို့ အားလုံးရင်ဆိုင်နေရတဲ့ စစ်အာဏာရှင်ဆိုတာ နှစ် (၆၀) ကြာ အမြစ်ကုပ်သွေးစုပ်နေတဲ့ စနစ်ကျကျဖွဲ့စည်းထားတဲ့ အဖွဲ့အစည်း တခုပါ

ကလိမ်ကကျစ် နည်းမျိုးစုံကို စောက်ရှက် တစ်အောင်စမှ မရှိ သုံးပြီး(သုံံးလည်းသုံးနေတဲ့) လူသတ်ကာ အလောင်းခိုးနေတဲ့ လူ့မိစ္ဆာဂိုဏ်း တခုပါ။

ကျနော်တို့ လျှော့မတွက်ပဲ ဖြစ်လာနိုင်မဲ့ loopholes အပေါက်တွေ မှန်သမျှကို ချင့်ချိန်စဉ်းစားပြီး ပိတ်သင့်ကပိတ်ဖို့ကြိုးစားရမယ်လို့ထင်ပါတယ်


အထက်က ကျနော် ရေးထားတာမှန်သမျှဟာ စစ်အစိုးရက သေချာကျနစွာ စီစဉ်ထားတဲ့ solid plan တခု မဟုတ်ပါဘူး။

ကျနော့ကိုယ်တွေ့နဲ့ ဆက်စပ်ပြီးစဉ်းစားမိတဲ့ theory တခုသာလျှင် ဖြစ်ပါတယ်။

လက်တွေ့တကယ်ဖြစ်လာနိုင်မယ်လို့တော့ မဆိုပါဘူးခင်ဗျာ။

Credit to orginal writter

No comments: