Saturday, April 3, 2021

အင်တာနက်ဖြတ်တောက်မှုနှင့် ပြိုကျသွားသော မြန်မာ့စီးပွားရေးအစိတ်အပိုင်း


=============================
အာဏာလုသွားတဲ့ ရက်ပေါင်းခြောက်ဆယ်နီးနီးမှာ လုံးဝပြိုကျသွားတာက အင်တာနက် ဆက်သွယ်ရေးနဲ့ သူနဲ့ ဆက်စပ်နေတဲ့ စီးပွါးရေး လုပ်ငန်းတွေဆိုရင် မှားမယ် မထင်ဘူး။

အရင်က တစ်ရက်ကို အေတီအမ် တွေကနေ ငွေသားသိန်း ၂၀ ထုတ်လို့ရနေရာကနေ၊ ခုဆို ၂သိန်း အထိလျှော့ကျသွားခဲ့တာဟာ Mobile Payment တွေကို ပိုပြီး သုံးစွဲစေချင်လို့ဆိုပြီး အသံကောင်း ဟစ်ခဲ့တဲ့ ဗဟိုဘဏ်ဟာ Mobile Internet တွေ အပိတ်ခံရပြီးနောက် တစ်နိုင်ငံလုံးရဲ့ Mobile Payment Infra တစ်ခုလုံး ပြိုကျသွားခဲ့တာအပေါ် ဘာမှ မလုပ်နိုင်ဘူး။

ပိုက်ဆံထုတ်ပေးစရာ မရှိတဲ့ ဘဏ်တွေကို အတင်းဖွင့်ခိုင်းပြီး စီးပွါးရေးကို အတင်းပြန်ပြီး လည်ပတ်ခိုင်းနေတာဟာ သေနေတဲ့ကျားကို သွေးရူးသွေးတန်းနဲ့ အသက်သွင်းဖို့ ကြိုးစားနေသလိုပဲဆိုရင် မှားမယ်မထင်ပါဘူး။

ငွေသားနဲ့ လည်ပတ်နေတဲ့ မြန်မာ့စီးပွါးရေးဟာ မြန်မာ့စီးပွါးရေးတစ်ခုလုံးရဲ့ အစိတ်အပိုင်း တစ်ခုသာလျှင် ဖြစ်ပါတယ်။ 

လွန်ခဲ့တဲ့ ဆယ်စုနှစ်ကာလမှာ အင်တာနက်စနစ် တိုးတက်လာတာတွေနဲ့ အတူ အွန်လိုင်းပေးချေမှု့တွေဟာ ငွေသားပေးချေမှု့တွေကို ကျော်လွန်ခဲ့ပြီးသား ဖြစ်ပါတယ်။

ခုလို အင်တာနက်စနစ် တစ်ခုလုံးကို ဖျက်ဆီးခံရပြီးတဲ့နောက်မှာ ရွေးချယ်စရာ မရှိတော့တဲ့ လူများစုဟာ ငွေသားပေးချေမှု့တွေကို ပြန်ပြီးသုံးစွဲလာကြရပါတယ်။

အကျိုးဆက်က ငွေသားလိုအပ်မှု့ အဆမတန် ကြီးထွားလာတာပါပဲ။

Online Banking တွေကနေ စာရင်းပြောင်းလွှဲတာတွေ လုပ်လို့ရတယ်ဆိုပေမယ့် Online Banking ဆိုတာဟာ စီးပွါးရေး လုပ်ငန်းအချင်းချင်း ပေးချေမှု့တွေ အတွက်သာ အဆင်ပြေပြီး စားသုံးသူအချင်းချင်း ပေးချေမှု့တွေ အတွက် ဘယ်လိုမှ အဆင်မပြေပါဘူး။

Mobile Internet ကို ပိတ်ဆို့လိုက်ပြီးတဲ့နောက် MPU, VISA, Master အစရှိတဲ့ Card တွေနဲ့ ပေးချေတဲ့စနစ်တွေ, Grab, Food Panda, Wave Money, KBZ Pay အစရှိတဲ့ Mobile Internet ကို မှီခိုနေတဲ့ စီးပွါးရေးတွေဟာ ပြိုကျသွားခဲ့ရပြီး ဖြစ်ပါတယ်။

အင်တာနက်ဆိုတာ အသွားနှစ်ဘက်ရှိတဲ့ ဓါးလိုပါပဲ။ သတင်းစီးဆင်းမှု့ကို ကန့်သတ်ချင်လို့ အင်တာနက်ကို ထိန်းချုပ်ရပါတယ်ဆိုတဲ့နောက်မှာ မြန်မာနိုင်ငံရဲ့ စီးပွါးရေး အစိပ်အပိုင်းတစ်ခုလုံး ပြိုကျပျက်စီးသွားစေခဲ့တာပါ။

အဆင်ခြင် မရှိတာလား၊ အာဏာရူးတာလားဆိုတာကတော့ မေးစရာကို မလိုတဲ့ မေးခွန်းပါ။ 

တည်ငြိမ်ပြီး ထိုးတက်ဖို့ အရှိန်ယူနေတဲ့ စီးပွါးရေးကို ဖျက်ဆီးတာဟာ မြန်မာနိုင်ငံသား အားလုံးကို သတ်ဖို့ကြိုးစားတာလို့ ပြောလိုတာပါပဲ။

ဆောင်းပါးရှင် - kaung myat
#MTKChannel #မိုးသောက်ကြယ်

No comments: