Saturday, November 6, 2021

'မြန်မာစစ်ခေါင်းဆောင်တွေက လူမဆန်တဲ့ရာဇဝတ်မှုတွေ စနစ်တကျ ကျုးလွန်နေ


\"\"မြန်မာစစ်ခေါင်းဆောင်တွေက လူမဆန်တဲ့ရာဇဝတ်မှုတွေ စနစ်တကျ ကျုးလွန်နေတယ်လို့ ကျနော်တို့ ကောက်ချက်ချတယ်\"\"

(Nicholas Koumjian, မြန်မာနိုင်ငံဆိုင်ရာ UN အထူးစုံစမ်းစစ်ဆေးရေးအဖွဲ့ခေါင်းဆောင်)

၆ နိုဝင်ဘာ၂၀၂၁


အာဏာသိမ်းမြန်မာစစ်တပ်ဟာ အကြမ်းဖက်သတ်ဖြတ်မှုတွေကို အစီအစဉ်ရှိရှိ စနစ်တကျနဲ့ ကို ကျုးလွန်နေတယ်လို့ (IIMM)မြန်မာနိုင်ငံဆိုင်ရာကုလသမဂ္ဂစုံစမ်းစစ်ဆေးရေးအဖွဲ့ခေါင်းဆောင် Nicholas Koumjian က မနေ့က ဂျီနီဗာမှာ ထုတ်ဖေါ်ပြောဆိုလိုက်ပါတယ်။


အာဏာသိမ်းချိန်ကနေစပြီး IIMM လွတ်လပ်တဲ့စုံစမ်းစစ်ဆေးရေးအဖွဲ့ကို ဆက်သွယ်ပေးပို့လာတဲ့ အထောက်အထားမှတ်တမ်း ၁ သန်း ခွဲကျော် လက်ခံရရှိခဲ့တယ်ဆိုပါတယ်။ ကျွမ်းကျင်သူတွေနဲ့ အချိန်ယူစစ်ဆေးခဲ့ပြီး မြန်မာစစ်တပ်ဟာ လူသားမျိုးနွယ်အပေါ်ဆန့်ကျင်တဲ့ ရာဇဝတ်မှုတွေကျုးလွန်နေတယ်ဆိုတာ သက်သေအထောက်အထားတွေနဲ့ အတည်ပြုနိုင်ခဲ့တယ်လို့ Nicholas Koumjian က ပြောပါတယ်။


မြန်မာစစ်တပ်ဟာ သူ့ကိုလက်မခံဆန့်ကျင်သူတွေ ကျန်းမာရေးဝန်ထမ်းတွေ သတင်းသမားတွေကို စနစ်တကျပစ်မှတ်ထားခဲ့သလို ဖမ်းဆီးမိသူတွေကိုလည်း စနစ်တကျ နှိပ်စက်သတ်ဖြတ်ခဲ့တယ်ဆိုပါတယ်။ လူမဆန်တဲ့ သတ်ဖြတ်မှုတွေဟာ နေရာတချို့မှာ စစ်သားတချို့က ကျူးလွန်တဲ့ပုံမျိုးမဟုတ်ပဲ အာဏာသိမ်းစစ်ခေါင်းဆောင်တွေရဲ့  ဗဟိုကလာတဲ့ညွှန်ကြားချက်အရကို ကျူးလွန်နေတာတွေ့ရတယ်ဆိုပါတယ်။ သတ်ဖြတ်မှုပုံစံတွေ ဖျက်ဆီးမှုပုံစံတွေဟာ တနိုင်ငံလုံးမှာ အတူတူဖြစ်နေတာတွေ့ရတယ်လို့လည်း Nicholas Koumjian က ပြောပါတယ်။


လက်တလောမှာ လူမဆန်တဲ့ရာဇဝတ်တွေကျူးလွန်နေတဲ့ မြန်မာစစ်တပ်ရဲ့\"\"အာဏာမသိမ်းခင်ကကျူးလွန်ခဲ့တဲ့ လူမျိုးတုန်းသတ်ဖြတ်မှုတွေအတွက်\"\" လည်း ဒေသတွင်းနဲ့ နိုင်ငံတကာမှာ တရားစွဲနိုင်ဖို့ ပြင်ဆင်နေပြီလို့လည်း Nicholas Koumjian က ပြောပါတယ်။ 


စစ်တပ်နဲ့ စစ်တပ်ထောက်ခံသူတွေရဲ့ FB အကောင့်တွေ FB ပေါ်က မှတ်တမ်းသက်သေအားလုံး ပေးဖို့ကိုလည်း သက်ဆိုင်ရာ FB ကုမ္ပဏီကိုတောင်းဆိုထားတယ်ဆိုပါတယ်။ FB ကုမ္ပဏီကနေ သက်သေတချို့ရပြီးဖြစ်ပေမယ့် တောင်းဆိုထားတာအားလုံး မရသေးဘူးလို့ Nicholas Koumjian ကပြောပါတယ်။


မြန်မာနိုင်ငံဆိုင်ရာ ကုလသမဂ္ဂအထူးစုံစမ်းရေးအဖွဲ့ကို ၂၀၁၈ ခုနှစ်က ဖွဲ့စည်းခဲ့တာဖြစ်ပြီး ရိုဟင်ဂျာတွေအပေါ် လူမျိုးတုန်းသတ်ဖြတ်မှုတွေနဲ့ မြန်မာနိုင်ငံထဲက နိုင်ငံတကာဥပဒေချိုးဖေါက်မှုတွေကို လွတ်လပ်စွာစုံစမ်းစစ်ဆေးဖို့ဖြစ်ပါတယ်။ 

အဖွဲ့ခေါင်းဆောင် Nicholas Koumjian ဟာ အမေရိကန်ဥပဒေပညာရှင်တဦးဖြစ်ပြီး ကမ်ဘောဒီးယား ဘော့စနီးယား နဲ့ အရှေ့တီမောက စစ်ရာဇဝတ်မှုတွေကို တရားစွဲဆိုဖေါ်ထုတ်ရာမှာ ဦးဆောင်ခဲ့သူဖြစ်ပါတယ်။

BNN

No comments: